Рускиот претседател Владимир Путин разговараше со францускиот лидер Емануел Макрон за ситуацијата во Украина, а посебно внимание беше посветено на обезбедување на безбедноста на нуклеарната централа Запорожје, соопшти денеска Кремљ.
„На иницијатива на француската страна, рускиот претседател имаше телефонски разговор со Макрон. Беше одржан детален и искрен разговор со размена на мислења за ситуацијата во Украина и за прашањата за обезбедување на безбедноста на нуклеарната централа“, се наведува во соопштението.
Путин го информирал Макрон за мерките што ги преземаат „руските техничари за заштита на електраната и му го привлекол вниманието на редовните напади на украинските сили врз централата, вклучително и складирањето на радиоактивен отпад“.
Во соопштението се додава дека „двајцата лидери изразиле подготвеност за неполитичка соработка со Меѓународната агенција за атомска енергија во врска со ситуацијата со електраната“.
