Украинската војска соопшти дека руските сили во регионот на Харков претрпеле значителни загуби, поради што некои војници дезертирале и ги соблекле униформите за да не бидат препознаени од цивилите.
„Некои непријателски единици претрпеа значителни загуби“, соопшти главниот штаб на украинските вооружени сили.
„Војниците дезертираат во цивилна облека и се обидуваат да се вратат на територијата на Русија. Во текот на денот забележавме повеќе од 15 такви случаи“, додаде тој.
Штабот ја повтори оценката на украинската армија дека за три дена напреднале речиси 50 километри на територијата под руска контрола и дека Русите се повлекуваат.
„Окупаторите се обидуваат да ги евакуираат ранетите војници и оштетената воена опрема во областите на населбите Вилхуватка и Бородојарска“, велат од штабот.
Киев во изминатите 24 часа повторно го зазеде градот Балаклија во Харков, кој шест месеци беше под руска окупација. Украина се приближи до важниот логистички и снабдувачки центар Купјанск, а Институтот за проучување на војната (ISW) верува дека најверојатно ќе го освои во наредните денови.