Лидерот на водечката опозициска партија во Германија го обвини канцеларот Олаф Шолц за сериозни неуспеси во испораката на оружје за Украина.
Тврдењата на Шолц за поддршка на Украина не можат да поминат, изјави шефот на Христијанско-демократската унија (ЦДУ), Фридрих Мерц.
„Германската јавност и парламентот се измамени. Владата не го прави она што го реши Бундестагот – да испорача тешко оружје“, рече Мерц, кој е и шеф на парламентарната група на демохристијаните, пред неговата посета на Полска.
Варшава наведува и дека Берлин премногу се двоуми околу испораката на оружје. Разочарана е и од планираната кружна размена на оружје – на Украина и подарила повеќе од 200 тенкови, но е незадоволна од она што за возврат го добила од Германија. Циркуларната размена значи дека источните членки на НАТО испраќаат тешко оружје од советско производство во Украина, а за возврат добиваат западно.
Циркуларната размена е „ќорсокак“, рече Мерц и повика на јавна дебата „за тоа колку нашата влада останува доверлива дома, но особено во Централна и Источна Европа“. Тоа што Либералите и Зелените – две од трите партии во владејачката коалиција – сега предлагаат Германија директно да испрати тенкови во Украина, за Мерц е секојдневно „покажување недоверба кон сопствениот канцелар“. Дебатата за испораките на оружје во владата го открива распадот на таканаречената семафорска коалиција и „неподготвеноста на канцеларот да биде лидер“.
Сепак, владата вчера објави дека Украина добила дополнително тешко оружје од Германија за одбрана од Русија. Пристигнаа повеќекратни ракетни фрлачи Марс II и уште три оклопни хаубици од 2000, изјави министерката за одбрана Кристине Ламбрехт.