Западот ризикува да влезе во нуклеарна војна бидејќи не разговара доволно со Русија и Кина, изјави британскиот советник за национална безбедност Стивен Лавгроув.
Тој тврди дека светските суперсили подобро се разбирале за време на Студената војна и дека недостатокот на дијалог ја зголемил можноста за погрешна пресметка, пренесе Би-Би-Си. Лавгроув додава дека сме во „нова ера на ширење“ каде опасното оружје е лесно достапно.
Лавгроув зборуваше во Центарот за стратешки и меѓународни студии во Вашингтон, фокусирајќи се на последиците од рускиот напад врз Украина и како што тој го нарече „лидерски натпревар во ерата по Студената војна“.
Според него, во текот на децениите на Студената војна, западните сили имаа корист од преговорите кои придонесоа за „разбирање на советските доктрини и способности, а истото важи и во спротивна насока“.
„ Тоа им даде на двете страни повисоко ниво на самодоверба, за да не се пресметаме погрешно и да влеземе во нуклеарна војна. Меѓутоа, денес ги немаме истите основи со оние кои можат да ни бидат закана во иднина, конкретно, мислам на Кина“, рече Лавгроув.
