Северна Кореја ги обвини САД за создавање воен сојуз во Азија, по примерот на НАТО и истакна дека Пјонгјанг е принуден да ја развива одбраната поради целта на Вашингтон да ја смени власта во оваа земја.
Критиките беа упатени во време кога се стравува дека Северна Кореја се подготвува за првата нуклеарна проба по пет години, откако лидерите на Јужна Кореја и САД неодамна потпишаа договор за распоредување дополнително американско оружје доколку е потребно за да се одврати Северна Кореја.
„ САД отворено одржуваат воени вежби со Јапонија и Јужна Кореја и преземаат сеопфатни чекори кон воспоставување на сојуз во стилот на НАТО во Азија“, соопшти севернокорејското Министерство за надворешни работи.
Во соопштението се повторува дека ваквите вежби претставуваат подготовки за војна против Северна Кореја.
„ Ова укажува на лицемерието на американската реторика за „дипломатски ангажман“ и „дијалог без предуслови, а во исто време открива дека нема промена во амбициите на САД да го соборат нашиот систем со сила“, се додава во соопштението.
Министерството не ја спомена конкретно нуклеарната или ракетната програма, но наведе дека Пјонгјанг е принуден да ја развие својата одбрана.
