Светската здравствена организација соопшти дека ќе ја преименува мајмунската сипаница за да избегне дискриминација и стигматизација бидејќи вирусот продолжува да се шири меѓу луѓето во невидена глобална епидемија на болеста.
Д-р Тедрос Аданом Гебрејесус, генерален директор на СЗО, рече дека организацијата „работи со партнери и експерти од целиот свет за да го преименува вирусот на мајмунска сипаница, неговиот вид и болестите што ги предизвикува“.
Овој потег доаѓа откако научниците повикаа на „итна“ промена на името, што тие го опишаа како „неточно“, „дискриминаторски“ и „стигматизирачко“ во извештајот објавен минатата недела.
Објавувањето на новото име ќе биде објавено „што е можно поскоро“, рече Тедрос.
Слична загриженост беше изразена во екот на пандемијата на коронавирус кога новите варијанти на КОВИД беа именувани по земјите или регионите во кои првпат беа откриени, што доведе до забрани за патувања и други ограничувања. Како одговор, СЗО воведе систем за именување кој новите варијанти ги нарекува букви од грчката азбука, па ја имавме алфа варијантата, омикрон и слично.
Во извештајот, научниците изразуваат загриженост дека „преовладувачката перцепција“ во медиумите и научната литература е дека овој вирус е ендемичен за луѓето во некои африкански земји.
Научниците предупредуваат на „сè поголем наратив во медиумите и меѓу многу научници кои се обидуваат да ја поврзат актуелната глобална епидемија со Африка или Западна Африка или Нигерија“. На пример, британската агенција за здравствена безбедност го вклучи алармот за прв пат откако болно лице пристигна во Лондон од Нигерија на 4 мај – и вирусот се шири веќе некое време.
„Во контекст на актуелната глобална епидемија, континуираното спомнување и номенклатура на овој вирус како африкански не само што е неточно, туку и дискриминаторски и стигматизирачко“, пишуваат експертите.
Тие дополнително ја критикуваат употребата на фотографии од африкански пациенти со лезии на големи сипаници во известувањето за епидемијата.
СЗО, исто така, ќе свика итен состанок на експерти за болеста следната недела за да се утврди дали сегашната епидемија е вонредна состојба за јавно здравје од меѓународно значење.
