Заврши состанокот на лидерите на Украина, Германија, Франција, Италија и Романија во Киев, изјави шефот на кабинетот на претседателот Володимир Зеленски.
– Украина има силна поддршка од меѓународната коалиција – напиша Андриј Јермак на Телеграма. Тој додаде дека претседателот Зеленски на своите колеги им предложил нов пакет санкции против Русија.
– Мора да го зголемиме притисокот врз агресорот и да работиме на седмиот пакет санкции, кој ќе вклучува ембарго за гас – напиша Јермак.
За време на посетата на Киев, италијанскиот премиер Марио Драги изјави дека Италија сака Украина да добие статус на кандидат за ЕУ и дека ќе го поддржи предлогот на следниот состанок на Европскиот совет на 23 и 24 јуни.
Францускиот претседател Емануел Макрон на прес-конференција по средбата рече дека сите се согласуваат и го поддржуваат кандидатскиот статус на Украина за влез во Европската унија. Макрон вети и дека Франција ќе и достави на Украина шест дополнителни топови Цезар со долг дострел.
Германскиот канцелар Олаф Шолц изјави дека дошол во Украина со јасна порака: Украина припаѓа на европското семејство.
Тој додаде дека Германија ќе ја поддржи одлуката за пристапување на Украина и Молдавија во ЕУ. Шолц, исто така, рече дека Германија ќе продолжи да ја поддржува Украина се додека тоа е потребно.