Најмалку десет лица се повредени во четвртокот откако руски ракетен напад оштети 25-катна станбена зграда во Киев, објави Украинската државна служба за итни случаи на Фејсбук.
– Државната служба за вонредни ситуации во Киев на 28 април во 20 часот и 13 минути добила дојава за пожар во главниот град. Како резултат на непријателското гранатирање, избувнал пожар во станбена зграда од 25 ката, а првиот и вториот кат се делумно уништени – се наведува во соопштението, пренесува Укринформ.
Се додава дека пожарот на вкупна површина од 100 метри квадратни е изгаснат во 21.25 часот, а во тек се операции за пребарување и спасување.
Според прелиминарните податоци, пет лица се спасени, а десет се повредени.
Претходно, градоначалникот на украинската престолнина Виталиј Кличко изјави дека оваа област во северозападниот дел на градот била двапати погодена, што предизвикало пожари во најмалку две високи згради, пренесе АП.
Експлозиите, кои разнесоа облаци од црн чад во воздухот, следеа набргу откако генералниот секретар на ОН Антонио Гутереш и украинскиот претседател Володимир Зеленски одржаа прес-конференција.
Украинските власти соопштија дека генералниот секретар на ОН и неговиот тим се безбедни.
