Претседателот на Белорусија Александар Лукашенко ја потпиша одлуката за промена на Уставот по референдумот.
На референдумот во Белорусија беше одобрен нов устав, со кој се откажа од својот ненуклеарен статус во време кога поранешната советска република стана почетна точка за руските трупи кои ја напаѓаат Украина, објавија руските новински агенции.
Белоруската изборна комисија објави дека 65,2 отсто од излезените граѓани гласале за.
Новиот устав дозволува нуклеарно оружје на белоруска територија за прв пат откако земјата се откажа од него по распадот на Советскиот Сојуз.
Западот претходно најави дека нема да ги признае резултатите од референдумот кој се одржува поради општата пресметка со белоруската опозиција и противниците на режимот на Лукашенко. Според активистите за човекови права, во Белорусија во моментов има повеќе од илјада политички затвореници.
Референдумот предизвика антивоени протести во неколку градови. Најмалку 290 лица се приведени, соопштија активисти за човекови права. Масовните протести избија во 2020 година по спорните избори за кои опозицијата тврди дека биле наместени. Откако Лукашенко започна насилна акција против демонстрантите, протестите во голема мера стивнаа.
Зборувајќи на избирачко место во неделата, Лукашенко рече дека може да побара од Русија да ѝ го врати нуклеарното оружје на Белорусија.
„ Ако (Западот) пренесе нуклеарно оружје во Полска или Литванија, до нашите граници, тогаш ќе му се обратам на Путин да го врати нуклеарното оружје што го дадов без никакви услови“, рече Лукашенко.
