Во Србија денеска пристигна првиот контингент од лекот против коронавирусот „паксловид“. Србија е првата земја во континентална Европа што го доби овој лек (сѐ уште се доставува во Обединетото Кралство во Европа), десет дена откако ЕМА (Европската агенција за лекови) одобри употреба и маркетинг на овој лек.
Комисија на Министерството за здравство на Србија, со која претседава проф. д-р Горан Стевановиќ, директор на Клиниката за инфективни болести, направи дистрибутивна листа врз основа на која лекот ќе се дистрибуира до здравствените установи.
„Паксловид“ е антивирусен лек, кој содржи две компоненти „ритонавир“ и „нирматрелвир“ и е наменет за орална употреба. Индициран е за третман на инфекција со Ковид 19 кај возрасни на кои не им е потребен дополнителен кислород и кои имаат зголемен ризик од прогресија во тешка форма на болеста. Се препорачува да се почне со употреба на лекот во првите пет дена по почетокот на симптомите.
Србија на крајот на минатата година беше меѓу првите заедно со САД и Велика Британија што потпиша договор со претставници на компанијата „Фајзер“ за купување на најдобриот лек против коронавирусот, кој го намалува ризикот од хоспитализација и тешки болести и до 89 проценти.
Министерот за здравство, Златибор Лончар, истакна дека вакцината останува основно оружје во борбата против вирусот, а дека лекот „паксловид“ е дополнителен напор на државата за зачувување на здравјето на граѓаните.
