Американскиот претседател, Џо Бајден, на прес-конференција во Белата куќа по повод првата година од неговото претседателствување рече дека тоа е година на предизвици и напредок посочувајќи дека ако Русија оди во Украина, тоа ќе има катастрофални последици.
Тој рече дека Москва ќе сноси одговорност доколку, како што наведе, ја нападне Украина.
„Претпоставувам дека Путин ќе тргне кон Украина“, рече американскиот претседател додавајќи дека тотална инвазија на таа земја, сепак, би предизвикала одговор што скапо ќе ги чини Русија и нејзината економија.
Бајден изјави дека верува оти Русија подготвува акција во Украина иако смета дека Путин сѐ уште не донел конечна одлука.
Американскиот лидер предложи дека ќе го ограничи пристапот на Русија до меѓународниот банкарски систем доколку ја нападне Украина.
