Северна Кореја лансира неидентификувана ракета во морето, соопшти јужнокорејската војска, а ова е прв ваков тест на Пјонгјанг во новата година.
Ракетата била лансирана во морето источно од полуостровот, соопштија командантите на штабот на Јужна Кореја, без да дадат дополнителни детали.
Северна Кореја во 2021 година објави дека успешно тестирала нов тип на балистичка ракета лансирана од подморница.
Овој нов обид дојде откако Северна Кореја не одговори на повикот на Вашингтон за разговори.
Преговорите со САД се во застој
За време на важен состанок на владејачката партија минатата недела, севернокорејскиот лидер Ким Џонг-ун потврди дека сака да ги зајакне воените капацитети на неговата земја и покрај меѓународните санкции.
Преговорите со Соединетите Американски Држави се во застој од средбата меѓу Ким Џонг-ун и тогашниот американски претседател Доналд Трамп во 2019 година.
По доаѓањето на Џо Бајден на власт, САД неколкупати изјавија дека се подготвени да се сретнат со севернокорејските претставници. Пјонгјанг досега ја отфрла понудата.