Компанијата „Боинг“ во средата пред судот се изјасни за виновна за авионската несреќа во 2019 година во Етиопија, во која загинаа 157 луѓе.
Според спогодбата меѓу „Боинг“ и семејствата на загинатите, адвокатите на жртвите нема да бараат кривична отштета, а „Боинг“ нема да ги оспорува тужбите поднесени во Илиноис, пишува Си-Ен-Ен.
„ „Боинг“ сака да се погрижи сите семејства кои ги загубиле своите најблиски во несреќата да бидат целосно обесштетени за нивната загуба. Со прифаќањето на одговорноста, „Боинг“ им дозволува на двете страни да се фокусираат на одредување соодветна компензација за секое семејство“, соопшти компанијата.
Адвокатите на жртвите во соопштението рекле дека „Боинг“ признал според договорот дека авионот „737 Max“ во сопственост на „Етиопија ерлајнс“ не бил безбеден и дека нема да се обиде да обвини некој друг за несреќата.
„ Ова е значајна пресвртница за семејствата во нивната потрага по правдата, бидејќи ќе обезбеди соодветно третирање и исполнување на условите за наплата на целосен надомест според законот на Илиноис“, велат адвокатите.
