Од 2022 година, шпанската влада ќе забрани рекламирање на слатки или висококалорични пијалоци за деца на Интернет, во кината, на радио и телевизија.
Шпанската влада најави дека од следната година ќе забрани рекламирање на слатки прехранбени производи наменети за лица помлади од 16 години.
Министерот за потрошувачи Алберто Гарзон изјави дека од 2022 година ќе биде забрането рекламирање на прехранбени производи како што се бисквити, сладолед, слатки или висококалорични пијалоци наменети за деца под 16-годишна возраст на Интернет, во кината, на радио и телевизија.
Гарзон рече дека неопходните консултации со Светската здравствена организација (СЗО) и Националната комисија за пазари и конкуренција се завршени.
„Стапката на прекумерна тежина кај децата во Шпанија е 23,3 отсто, а дебелината 17,3 отсто. За децата на возраст од шест до девет години, овие податоци вкупно надминуваат 40 проценти. Ова се алармантни бројки“, предупреди Гарзон.
Научна студија објавена во Шпанија во септември оваа година покажа дека девет од десет телевизиски реклами за деца ги прекршуваат правилата за здрава исхрана.