Патничка со авиокомпанијата „Американ ерлајнс“ е уапсена во авион во Њу Орлеанс откако одбила да носи маска, соопштија локалните власти.
Инцидентот се случил на аеродромот Луис Армстронг, а авионот требало да полета околу 21:30 часот во петокот вечерта кон Далас, објави „Њу Орлеанс адвокејт“.
„Никогаш не сум видел такво нешто“, изјавил патник во авионот, професорот по историја Патрик Мејни, за локалниот весник во Њу Орлеанс.
Мејни посочил дека двајца вооружени полицајци влегле во авионот и ѝ наредиле на жената да излезе, бидејќи не сакала да стави маска, што претставува кршење на федералниот закон за комерцијални летови, пренесува „Њујорк пост“.
„Таа одби да стави маската, а потоа ѝ рекоа да стане. Почна да вреска и да пружа отпор додека беше апсена, а рацете ѝ ги врзаа зад грб. Постојано врескаше десет минути додека ја изнесуваа“, додаде Мејни.
Очевидецот раскажал дека жената упорно повторувала оти не е животно и дека не сака да ја третираат како животно. Американската авиокомпанија потврди дека летот бил одложен, како и дека авионот бил принуден да се врати поради инцидентот.
Уапсената жена се соочува со обвинение за вознемирување на јавниот мир, отпор при апсење и полесен физички напад.
