Повторна вакцинација против коронавирусот започна денеска во Москва, што е објавено и на веб-страницата на градоначалникот, Сергеј Собјанин и владата во Москва.
Според неодамна усвоениот протокол, во врвовите на епидемиските бранови, потребна е вакцинација на секои шест месеци, а доколку епидемиската состојба е поволна – еднаш годишно, пренесува РИА Новости.
Наведено е дека повторната вакцинација е достапна за граѓаните кои ја примиле првата доза на вакцината пред повеќе од шест месеци и дека е можна на 20 пунктови. Граѓаните можат повторно да се вакцинираат со „Спутник в“ или „Спутник лајт“, а не е важно која вакцина ја примиле при првата вакцинација.
Делта сојот на вирусот предизвика нов бран на пандемијата, во Русија, особено во Москва, каде речиси секојдневно се регистрираат рекордни бројки на новозаразени.
Така, во Русија во изминатите 24 часа починале 672 лица како последица на вирусот, што е најголем број на смртни случаи за 24 часа од почетокот на пандемијата.
Вкупно 135.886 лица починале во Русија од почетокот на пандемијата, според агенцијата ТАСС.
