Речиси совршено зачуван скелет на кит, за кој се проценува дека е стар меѓу 3.000 и 5.000 години, е откриен во близина на брегот на Тајланд.
Скелетот бил пронајден на почетокот на ноември на околу 12 километри од брегот западно од Бангкок. Се верува дека е долг 12 метри и припаѓа на еден вид познат како Брајдов кит.
Експертите се надеваат дека ова откритие може да биде еден вид „прозорец кон минатото“, особено кога станува збор за истражувањата за нивото на морето и биодиверзитетот.
„Делумно фосилизирани коски се ретко откритие“, изјави за Би-би-си истражувачот на овие големи цицачи Маркус Чуа од Сингапурскиот државен универзитет.
„Постојат неколку примероци на делумно фосилизирани китови во Азија“, рече тој, додавајќи дека уште помалку се наоѓаат во толку добра состојба.
Фотографиите објавени од тајландскиот министер за животна средина Варавут Силпа-арха покажуваат коски кои се очигледно речиси недопрени. Досега, рече тој, се ископани повеќе од 80 проценти од скелетот, поточно `рбетот, ребрата, перките и едното рамо.
Се проценува дека само главата на пронајдениот фосил е долга дури три метри, бидејќи станува збор за огромен вид кит, кој обично тежи помеѓу 15 и 20 тони.
Биологот Чуа верува дека ова откритие ќе им донесе на истражувачите нови сознанија за минатото на овој вид китови и ќе им овозможи да утврдат кои се разликите во споредба со денешните Брајдови китови.
