„22 починати во текот на вчерашниот ден од Ковид-19, тоа е директна вина на Комисијата за заштита од заразни болести и Венко Филипче, кои преспаа цело лето без ништо да направат со цел да ја подготват државата за есенскиот бран. Секој ден е нов пик. За една недела имаме над 2.000 заболени, а Филипче, кој тврдеше дека толку ќе биде бројот на заразени во тек на целата пандемија не гледа причина да си поднесе оставка“, соопшти ВМРО-ДПМНЕ.
Според партијата, Венко Филипче го внесува системот во хаос.
„Венко Филипче не направи ништо за зголемување на болничките капацитети иако знаеше дека нè очекува есенски бран. Власта не направи ништо ниту навреме да обезбеди вакцина против сезонскиот грип, а со тоа ги остави возрасните и хронично болните на силен удар на грипот во време на пандемија. Венко Филипче не инвестира ниту во здравствениот персонал и со своето лошо менаџирање само придонесува медицинскиот кадар да ја напушта државата. Граѓаните очекуваат сериозен пристап, а не аматеризам. Одговорност веднаш“, се додава во соопштението.