Според одлуката на Владата, на работните места и во редовен работен процес се враќаат само родителите на деца вклучени во воспитно-образовниот процес во училиштата и вработените во институциите надлежни и со зголемен обем на работа за време на изборниот процес.
На 74-тата седница одржана вчера, Владата донесе одлука за изменување и дополнување на одлуката за мерки за спречување внесување и ширење на Ковид-19, со што го прифати предлогот на Комисијата за заразни болести, со кој од категориите лица што се ослободени од работа и работни активности – родители на деца до 10-годишна возраст, во овој период да се вратат на работните места само родителите на децата што се вклучени во воспитно-образовниот процес во училиштата имајќи предвид дека учебната 2019/2020 година е завршена.
Дополнително, со оваа одлука на своите работни места и во редовен работен процес се враќаат сите вработени во институциите, кои за време на претстојните предвремени избори за пратеници во Собранието имаат зголемен обем на работа во делокругот на нивната надлежност поврзана со изборниот процес (на пример: Државната изборна комисија, Основниот и Вишиот управен суд и други), и кои досега по разни основи беа опфатени и ослободени од работни активности со мерките и препораките на Владата.