Интегрално ја пренесуваме прес-конференција, Богданка Кузеска, портпаролка на СДСМ:
Со своето неодговорно и несериозно однесување за време на кризата со коронавирусот, Наќе Чулев го загрози јавното здравје и денес сите ги чувствуваме последиците од таквиот неодговорен однос.
Наместо да се стави во функција на почитување на мерките од страна на граѓаните и санкционирање на прекршувањата, на Чулев поважно му беше да го одбрани својот шеф Мицкоски за случајот со теретаната.
Изјавата на Чулев дека граѓаните не треба да бидат казнувани заради непочитување на мерките и задолженијата придонесе за масовно непочитување на мерките од страна на граѓаните.
Полицијата предводена од Чулев не презеде ништо ни кога се прекршуваа забраните за собири, кога масовно се прекршуваа забраните за движење.
Покрај тоа и самиот Чулев организираше јавни собири без почитување на мерките, а на Денот на полицијата новинари и дипломати дури добија и чадна бомба во непосредна близина.
Денеска, за жал стигнува сметката за неказнувањето и неработата на Чулев, а таа се гледа преку бројот на заразени регистрирани денеска.
Почитувани,
Ова е само уште еден доказ за несовесното и незрело однесување на Чулев и ВМРО-ДПМНЕ кои на овој начин дејствуваат против јавното здравје.
Чулев по налог на Мицкоски не само што не помага, туку и одмага во борбата против последиците од коронавирусот. На Чулев и ВМРО-ДПМНЕ им е важно само да ја злоупотребуваат полицијата како во времето на режимот, наместо таа да биде во функција на обезбедување на законите.
Затоа почитувани, потребни се избори и нова Влада и Собрание со полн легитимитет од граѓаните.
Изборите се решение за незрелото, неодговорно и несериозно однесување на Христијан Мицкоски и неговите кадри во техничката влада.
На државата и се потребни институции со полн капацитет кои ефикасно ќе се справат со последиците од актуелната пандемија, но и ќе бидат подготвени за новиот бран кој по сите најави се очекува наесен.
