Поранешниот генерален секретар на НАТО, Хавиер Солана, во средата беше примен во болница, а откако му беше направен тест, истиот бил позитивен на коронавирус, јавуваат светските медиуми.
Во петокот дневниот шпански весник ABC прв објави дека Солана во средата бил хоспитализиран во Мадрид поради коронавирусот.
Солана политичката кариера ја започна во 1992 година кога до 1995 година беше шпански министер за надворешни работи во владата на Фелипе Гонзалес, а потоа следува пресврт во неговите политички ставовит.
Седумдесет и седумгодишниот Хавиер Солана од 1995 до 1999 година ја извршуваше должноста генерален секретар на НАТО, иако како социјалист претходно се изјаснуваше притив северноатлантската воена алијанса. Од 1999 година до 2009 година беше Висок претставник за заедничка надворешна и безбедносна политика на ЕУ, кога често преостојуваше во Македонија поради вооружениот конфликт во 2001 година.
Вонредна состојба во Шпанија поради коронавирусот
Премиерот на Шпанија, Педро Санчез, денеска објави двонеделна вонредна состојба во земјата за да се спречи ширењето на новиот коронавирус. Санчез изјави дека вонредната состојба ќе ѝ овозможи на Владата да ги мобилизира сите ресурси, вклучително и војската за да се спречи пораст на новозаболени. Тој имаше телевизиско обраќање до нацијата.
Министерството за здравство на Шпанија објави дека од коронавирусот се заразени 4209 луѓе, од кои половината се во Мадрид. Тоа е за 33 отсто повеќе во споредба со претходниот ден.
Досега во Шпанија од вирусот починаа 120 луѓе, а 189 се опоравиле од заболувањето.
Шпанскиот премиер предупреди дека бројот на заболени во земјата следната недела може да се зголеми на повеќе од 10 илјади случаи.
Воведувањето на вонредната состојба ќе ѝ овозможи на Владата да ја ограничи слободата на движење, легално да конфискува стока и да преземе контрола на индустриските и приватните објекти, вклучително и на приватни болници, рече Санчез.
Весникот Ел Паис пишува дека може и да се одложат изборите кои треба да се одржат во два шпански региони, закажани за 5 април.
Шпанија е меѓу европските земји во кои постои голем ризик да доживее колапс на здравствениот систем како што е во Италија.
Во Италија заразата е потврдена кај 15.113 луѓе, од кои 1016 починаа.
