Секогаш во средиштето на збиднувањата...

Пожарите во Австралија ќе станат редовна појава поради глобалното затоплување, тврдат научниците

фото Илустрација/Pixabay

Британски научници тврдат дека тековните пожари во Австралија се само најава за тоа што ќе се случува во светот поради зголемувањето на температурите.

Професорот Ричард Бетс смета дека ова е само дел од условите за живот што светот ќе ги доживее со порастот на просечната температура од три Целзиусови степени, пренесе Би-би-си.

Во анализите за влијанието на климатските промени, научниците заклучиле дека ризици од пожар постојат низ целиот свет и дека постои врска меѓу климатските промени и зголемената фреквенција на пожари.

„Ова е забележливо во многу региони, вклучително и западните делови на САД и Канада, Јужна Европа, Скандинавија и Амазонија. Затоплувањето предизвикано од човечки фактор исто така го зголемува ризикот од пожари во други региони, како Сибир и Австралија “, вели Метју Џонс од Универзитетот во Источна Англија.

Во студијата исто така се наведува дека влијанието на многу фактори врз климатските промени ќе се влошува сè додека светот не направи нешто за да ја стабилизира климата и да ја намали емисијата на јаглерод диоксид./Makfax