На подрачјето на градот Вашингтон, Федералното биро за истраги на САД (ФБИ) објавува огласи на „Фејсбук“, кои се чини дека се осмислени да регрутираат руски шпиони, како и оние што се запознаени со нивните активности, објави Си-ен-ен.
Новинарите на Си-ен-ен забележале неколку огласи со таа цел. Еден содржи фотографија од една млада дипломатка со семејство, а освен тоа, на руски се вели: „За твојата иднина, за иднината на твоето семејство“.
Друг оглас покажува слика на шаховска табла со текст на руски јазик: „Зар не е сега на тебе ред да направиш потег?”
Огласите водат до веб-страницата на ФБИ Вашингтон, во која на англиски и руски јазик се дадени детали за тимот за контраразузнавање и адресата на теренската канцеларија на ФБИ. На страницата се вели: „Посетете нè лично“, пренесува Index.hr.
„Можеме само да коментираме дека Русија има голем број разузнавачки службеници стационирани во руските дипломатски објекти во целиот свет. Тие се многу активни и претставуваат безбедносен ризик за САД и нашите сојузници“, рече Ален Е. Колер, агент на ФБИ, за Си-ен-ен./Makfax
