Американскиот претседател Доналд Трамп во средата нареди забрана за виза на високи функционери на иранската влада и членовите на нивните семејства, спречувајќи ги да патуваат, учат или работат во Соединетите Американски Држави.
Овој потег доаѓа откако семејствата на Американците затворени во Иран со години лобираа во Белата куќа за да им се забранат визи на децата или роднините на највисоките функционери во иранската влада.
Во моментот, најмалку четворица Американци се наоѓаат в затвор во Иран, а групите за човекови права и набљудувачите на ОН велат дека притворањето е произволно и неосновано.
Во својата објава, Трамп го обвини Иран дека се заканува на мирот и стабилноста на Блискиот Исток и произволно приведува Американци.
„Утврдив дека е во интерес на Соединетите Држави да преземат акција за ограничување и суспендирање на влезот во САД, како имигранти или неимигранти, на високи владини претставници на Иран и нивните непосредни членови на семејството“, изјави Трамп.
Семејствата на приведените им обезбедиле на администрацијата и на неколку пратеници список на ирански државјани кои живеат во САД, за кои се тврди дека се деца или роднини на високи ирански функционери, вклучувајќи го и самиот претседател Хасан Рухани.
„Иранскиот режим со години го критикува и работи против Америка, додека во исто време официјални лица на режимот и нивните членови на семејството тивко ја искористуваат слободата и просперитетот на Америка, вклучувајќи ги и нашите одлични можности за образование, вработување, забава и култура“, изјави портпаролот на Стејт департментот.
„Со оваа наредба, на високи функционери на режимот и нивните семејства повеќе нема да им биде дозволено во Соединетите Држави да ги искористат придобивките од нашето слободно општество, додека иранскиот народ страда под корупцијата и лошото работење на иранскиот режим“, додаде портпаролот.
