Генералното собрание на Обединетите нации побара од Велика Британија во рок од шест месеци на Маурициус да му го врати архипелагот Чагос, каде што се наоѓа британско-американска стратешка воена база.
ОН ја изгласа резолуцијата на иницијатива на Маурициус. Таа не е обврзувачка, но има политичка вредност. „За“ гласале 116 земји, шест гласале „против“, меѓу нив и САД, а 56 биле воздржани.
Архипелагот Чагос се наоѓа во центарот на повеќедецениски спор по британската одлука од 1965 година да го раздвои архипелагот од Маурициус и да постави воена база заедно со САД. Велика Британија протерала околу две илјади луѓе од Чагос во Маурициус и Сејшелите во текот на 60-ите и 70-ите години за да направи место за воена база.
Маурициус стекна независност од Велика Британија во 1968 година и од тогаш бара да му биде вратен архипелагот.
Британското Министерство за надворешни работи соопшти дека не го признава суверенитетот на Маурициус над Чагос и дека стои зад веќе кажаниот став дека ќе ѝ го врати архипелагот на оваа држава кога повеќе нема да биде потребен за одбранбени цели.
„Заедничката британско-американска база ѝ помага на Британија и на светот во борбата против тероризмот, организираниот криминал и пиратите“, тврди Лондон.
