Тригодишното момче го пронајде американската гранична патрола, која се обидува да ги пронајде неговите родители врз основа на бројот на телефонот запишан на неговите чевли.
Напуштеното момче мигрант беше пронајдено во поле со пченка, недалеку од градот Браунсвил, на границата меѓу Мексико и американската држава Тексас, објави Ен-би-си.
Членовите на пограничната патрола го затекнаа момчето како плаче, а на неговите чевли беа напишани само името и телефонскиот број.
Момчето било однесено во полициска станица, а полицијата досега не успеала да стапи во контакт со неговите родители или некој што го познавал.
Граничните полицајци рекоа дека момчето во станицата се смирило, гледало телевизија и дека ќе биде однесено во здравствен центар за понатамошна нега.
Шефот на пограничната патрола во долината на Рио Гранде верува дека момчето било во поголема група која наишла на агенти и дека мигрантите потоа се разбегале и го оставиле момчето само.
Бројот на семејства и деца што се обидуваат илегално да ја преминат границата од Мексико во САД во последните месеци е во пораст.
Во март 8.975 деца патувале без родители, но најмногу во групи, а минатиот месец 53.077 родители и деца ја преминале границата.
