Илјадници Перуанци во четвртокот се простија со поранешниот претседател Алан Гарсија, кој се самоуби пред неколку дена. Во средата, претседателот Мартин Визкара прогласи тридневна национална жалост.
Гарсија се застрелал во главата во средата за да го избегне апсењето во врска со обвиненијата за примање мито од бразилската градежна компанија „Одебрехт“.
Пријателите, сојузниците и лидерите ширум политичкиот спектар му оддадоа почит на Гарсија во седиштето на неговата партија АПРА, една од најстарите политички партии во Латинска Америка, која на Гарсија му помогна двапати да стане претседател.
Визкара нареди во Конгресот на земјата и други јавни институции знамињата да се вејат на половина копје во чест на поранешниот претседател.
Но, и покрај тоа, некои од најистакнатите сојузници на Гарсија го обвинија Визкара дека е убиец, одекнувајќи ги неодамнешните коментари на Гарсија дека неговото гонење е политички мотивирано.
Истрагата во Перу се засили во последниве месеци, а судијата нареди друг поранешен претседател, Педро Пабло Кучински, да биде ставен в затвор пред судењето во врска со компанијата.
Скандалот веќе ги допре највисоките нивоа на владејачката политичка класа во Перу.
Поранешниот претседател Алехандро Толедо се бори против екстрадицијата од САД откако перуанскиот судија во 2017 година нареди и тој да биде ставен в затвор, додека друг поранешен лидер Оланта Хумала помина девет месеци во притвор пред да биде ослободен минатата година.
