Собранискиот спикер Талат Џафери го вратил во кривичниот суд барањето за одземање на имунитетот на пратеникот Трајко Вељаноски кое претпладнево стигна во Собранието. Како што објаснуваат од Кабинетот на Џафери, барањето го вратиле назад поради грешка.
„Претседателот на Собранието го врати писмото поради грешка на повикување на член и од моментот на ново доставување на писмото ние сме спремни да постапиме по сите рокови“, велат од Кабинетот на Џафери.
Од судот, пак, објаснуваат дека направиле техничка грешка и дека до Собранието веќе го доставиле коригирано барањето за одземање на имунитетот на Вељаноски.
Следна на потег е собраниската Комисија за деловнички и мандатно-имунитетни прашања, со која претседава пратеникот Павле Богоевски.
Според деловникот, откако претседателот на Собранието ќе го достави барањето до комисијата, истата треба да одржи седница на која ќе го разгледа барањето и да го достави извештајот до собранискиот спикер. По добиениот извештај од Комисијата, Собранието најдоцна во рок од три дена треба да одлучува на пленарна седница. Одлуката за одземање на имунитетот се носи со мнозинство од вкупниот број пратеници.
Поранешниот претседател на Собранието, Трајко Вељаноски, заедно со Миле Јанакиески и Спиро Ристоски вчера попладне беа приведени на распит по наредба на Јавното обвинителство под сомнение за вмешаност во настаните од 27 април 2017 година.
(Makfax)
