Сите министерства и државни институции на своите веб-страници го сменија името на државата во Република Северна Македонија, освен претседателот Ѓорге Иванов, кој сè уште е претседател на Република Македонија. Комисиите, агенциите, министерствата, Владата, Собранието, во текот на последните два дена вршеа промени на нивните веб-страници, а прв тоа го стори претседателот на Собранието, Талат Џафери.
Денеска на полноќ истекува рокот за промената на името на сите дигитални записи, логoа, меморандуми, електронски комуникации, веб-страници, медиуми кои произлегоа од преспанскиот договор.
Шефот на државата не го ратификуваше Указот на договорот од Преспа, кој беше објавен во „Службен весник“ само со фуснота.
Освен веб-страниците, сите институции треба соодветно да ги изменат меморандумите, печатените материјали, папките и индикаторите во рок од 2 недели.
