Петровска: Граѓаните имаат право на информации за депонијата во Свети Николе

Граѓаните имаат право на целосни информации што ќе значи санитарната депонија во Свети Николе, изјави државниот секретар за животна средина и просторно планирање Ана Петровска, која присуствуваше на 26. Вонредна седница на Советот на општината.

Министерството за животна средина и просторно планирање го презентираше проектот со посебен осврт на техничките карактеристики на централната инсталација и придобивките за животната средина од ваквото управување со отпад наспроти, како што посочуваат од Министерството, посточкиот неорганизиран систем. Петровска изрази задоволство што проектот со кој, како што вели, ќе се воспостави современиот систем за управување со отпад во 18 општини од Источниот и Североисточниот Регион и општина Свети Николе и за кој се обезбедени средства преку ИПА-фондовите на Европската Унија, конечно продолжил и е доведен во фаза кога треба да се почне со набавка на камиони, контејнери и изградба на централниот објект.

Според Петровска, ако досега се разговараше со доносителите на одлуки, отсега па натаму се отвора процесот на транспарентно вклучување на жителите во процесот на донесување одлука и ќе се разговара со граѓаните сè додека не се обезбедат доволно информации што една ваква депонија, за која во Македонија немаме пример, ќе значи за локалното население, на регионално ниво, но и на национално ниво. Таа вели дека овој процес на транспарентна консултација со засегната јавност ќе продолжи сè додека не се одговорат сите прашања и не се разрешат сите недоумици кои произлегуваат од стравот дека изградбата на ваквата санитарна депонија ќе наштети на локалните органски земјоделци, на подземните води или на амбиенталниот воздух.

На седницата, покрај членовите на Советот на општината присуствуваа и претставници од Министерството за животна средина и просторно планирање, претставници од месните заедници Мустафино, Ерџелија, Немањица и Мечкуевци како и претставници на граѓански здруженија од Овчеполието.