Наградени најдобриот пожарникар, полицаец и крводарител за 2018 година

Градоначалникот на Град Скопје, Петре Шилегов, денеска ги додели наградите на најдобриот пожарникар, полициски службеник и крводарител во Скопје за 2018 година.

„Хуманоста е општествена вредност. Таа е дел од нашите принципи. Таа е дел од нашата етика. Скопје е Град на солидарноста и како таков ги негува традициите на хуманост и солидарност кон сите оние на кои им е потребна помош. За таа цел Град Скопје дополнително ги мотивира оние што најмногу придонеле за промоција на хуманоста со своите дела и доделува награди за најдобар полициски службеник, пожарникар и крводарител. Сметам дека оваа награда освен за лична мотивација ќе послужи и како добар пример во средината во која живеете и работите“, рече Шилегов.

За своите заслуги во работењето и за својата пожртвуваност награди денеска добија: Елвис Далипи, од Бригадата за противпожарна заштита на Град Скопје, Бранимир Китановиќ, вработен во Одделението за безбедност на патниот сообраќај при Секторот за внатрешни работи – Скопје и Тони Ставревски, истакнат крводарител кој до својата 50-та година има дарувано крв 102 пати.