Премиерот Зоран Заев заедно со министерот за внатрешни работи, Оливер Спасовски, министерката за одбрана, Радмила Шекеринска, и министри во Владата денеска присуствуваа на комеморација за прерано починатиот градоначалникот на општина Охрид, Јован Стојаноски, и им изразија сочувство на сопругата на Стојаноски, на членовите на семејството, и на колегите и соработниците на градоначалникот на Охрид и професор на Факултетот за туризам и угостителство во овој град.
„Во овие моменти тешко е да се најдат зборови за утеха за семејството на Јован. Замина прерано од животот на своите најблиски. Останаа толку многу планови и заеднички очекувања. Во овие моменти на огромна тага, дозволете од мое лично име и од име на членовите на Владата на Република Македонија да упатам искрено сочувство до сите членови на вашето семејство, до роднините и пријателите. Замина прерано и за сите нас. Ненадејната смрт на Јован е загуба за академската заедница, за нашата држава, за партијата СДСМ и за Охрид. Низ годините зад нас тој даде огромен придонес со своето посветено работење. Остави траги и предизвикуваше почит, кои секогаш ќе се паметат. Јован беше колега, пријател и голем професионалец. Како градоначалник беше посветен на својата визија Охрид да биде вистинска европска, културна и туристичка престолнина. Беше препознаван како човек, пријател и сограѓанин, со топла и непосредна природа. Беше отворен за разговор за секој личен проблем. За секоја иницијатива и предлог. Почитуваше и разбираше“, рече Заев.
Неговите постапки и однесувања, додаде тој, со одмереност, ненаметливост и внимателност ги споделуваше со сите со кои соработуваше или се среќаваше.
„Тие вредности правеа од секој негов колега, соработник, пријател и од сите сограѓани во градот и пошироката заедница, да му возвраќаат на ист начин. Со длабока почит. Изгубивме добар, коректен и успешен човек. Замина прерано, но сеќавањата за него ќе останат засекогаш. Нека почива во мир и нека му е вечна слава“, рече Заев.
