За помалку од еден час заврши состанокот на Работната група за помирувањето, каде во фокус на средбата беше нацрт-верзијата на законот за амнестија за 27 април. Дел од членовите за „Макфакс“ велат дека имале кратка дискусија од која произлегле некои нови предлози. И од независната пратеничка група од ВМРО-ДПМНЕ и коалицијата потврдуваат дека биле изнесени забелешки во врска со нивниот предлог за амнестија, за што процениле дека треба да направат пауза за дополнителни правни консултации.
Работната група во која освен пратениците, членуваат и правни експерти , како и заменик-министерот за правда, Оливер Ристовски, најверојатно утре ќе се состане повторно бидејќи ги чекаат да се вратат од службено патување и другите колеги кои се дел од телото, како и двете копретседателки на Интерпартиската парламентарна група за помирување, реформи и интеграција, Фросина Ременски и Емилија Александрова. Откако нацрт-законот ќе го помине филтерот на работната група, ќе биде доставен до координативното тело, кое според најавите треба да има седница во среда.
Официјално од групата за помирување велат дека случувањата во кривичниот суд не влијаат директно врз подготовката на законското решение, но неофицијално новите сведочења на дел од обвинетите за 27 април фрлаат ново светло на процесот. Оттаму сепак не откриваат како ја решиле правната дилема за тоа кој се ќе биде амнестиран од одговорност и како ќе се направи правна дистинкција на лицата кои тепале и тие кои не извршиле насилство на крвавиот четврток. Единствено што неколку пати потенцираат од работната група, а што претходно нагласи и премиерот Заев е дека нема да се амнестира командна одговорност, како и за организаторите и нарачателите на настаните од 27 април 2017 година.
