НАГРАДА „ЗА ЖИВОТНО ДЕЛО“ ЗА 2018 ГОДИНА НА СЛАВКО КРСТЕВСКИ

Во салата за презентации во СОУ „Крсте П. Мисирков“, Демир Хисар, вчера на ден 7.12.2018г. се одржа свечена седница на Совет на Општина Демир Хисар – церемонијално врачување на едно од највисоките општински јавни признанија, наградата „ЗА ЖИВОТНО ДЕЛО“ за 2018 година на Славко Крстевски од с. Слепче, Демир Хисар.
Одбележувањето на овој настан се одржа во предвечерието на прославата на еден од најголемите празници на Македонскиот народ, 8. декември, Денот на упокојувањето на Св. Климент Охридски – Чудотворец.

Свечениот дел официјално го отвори претседателот на Советот на Општина Демир Хисар, Благоја Станојоски, а за номинацијата за доделување на награда „За животно дело“ воведно обраќање и говор имаше Живко Поповски – Цветин, претставник на Македонското здружение за култура, обичаи и традиции „Гороцвет“.

Општинската награда „ЗА ЖИВОТНО ДЕЛО“ претставува своевиден врв на благодарност и пофалба од страна на општината до сите кои преку својот долгогодишен труд, работа и постигнати резултати успеале да ја промовираат Општина Демир Хисар и да постигнат врвни резултати достојни за почит.
Славко Крстевски, годинашен добитник на наградата „За животно дело“ којшто со својот пример на неуморник, најдобро и најверно докажува дека постојаното создавање е трајна задача за секој поединец и поука за младите генерации дека ниедно време не е лошо и доцна за создавање.

Претседателот на Советот на Општина Демир Хисар, Благоја Станојоски најпрво го поздрави Славко и сите присутни кадешто и воедно му честиташе за наградата и признанието.
„Денешниов ден и сите вакви свечени и празнични прилики, во сите нас будат чувство на гордост и благодарност, чувство на одговорност и обврска спрема сите граѓани кои го одбрале Демир Хисар за свое место за живеење и кои дале посебен придонес во неговиот развој.
Доделувањето на наградата „ЗА ЖИВОТНО ДЕЛО“ на нашиот неуморен сограѓанин Славко Крстевски е резултат на несекојдневен и долгогодишен и благороден напор за благосостојбата на општината. Всушност, големото животно искуство и огромниот труд, високи резултати и беспоштеден творечки, трудбенички и интелектуален напор на Славко Крстевски, всушност претставуваат жива слика и оригинален позитивен пример за придонесот што секој од нас го дава и треба да го дава во градењето на иднината на оваа општина. Оттаму и овој поединечен успех на годинашниов лауреат, секој од нас треба да го слави како нов поттик за вложување на индивидуални дарежливи напори за колективен напредок во сите сфери на животот“ – истакна Станојоски.

За целта на доделувањето на оваа и другите награди предвидени со Одлуката за јавни признанија на Општина Демир Хисар, пред присутните се обрати и даде образложение за Одлуката, Татјана Кочовска, претседател на комисијата за одбележување на празници и манифестации и доделување на признанија и награди.
„Славко Крстевски е еден од нашите современици кој во својата 8ма деценија од животот, со несфатлива скромност на обичен човек се носи со бремето на големи благодарности и пофалби за сè што е постигнато во Општина Демир Хисар во периодот кога градот и општината ја доживувале вистинската развојна ренесанса, а чиишто плодови ги уживаме и ден денешен.
Едноставно, малку е една ваква свечена прилика да се нотираат сите негови заслуги кои што, благодарение на иницијативата на Македонското здружение за култура, обичаи и традиции „Гороцвет“, поддржувачите на иницијативата на Универзитетот за аудиовизуелни уметности ЕФТА и Македонското здружение на медицинските сестри, како и група познати македонски интелектуалци и уметници, коишто според обемот, значењето и вредноста, вредат повеќе од една награда. Што ќе рече, наградите не се добиваат, туку добитниците ги создаваат со своите дела“, рече Татјана Кочовска на своето пригодно обраќање.

За името на Славко Крстевски и неговиот богат животен пат се врзуваат прегорна работа, особено истакната, нагласена и општествено призната во областа на културата, уметноста, библиотекарството, просветата, публицистиката. За него покрај веќе искажаните, чуени и потврдени епитети и квалификативи, уште ќе се чуе дека е човек со исклучителна документаристичка педантерија, човек со исклучителен Божји дар да памти, но и да оживува настани за коишто досега, освен што некаде и од некого сме чуле, никој не се охрабрил да ги опише и овековечи.

Со најискрени и најсрдечни пожелби, градоначалникот на Општина Демир Хисар, Марјанче Стојановски му честиташе на Славко за добиената награда „ЗА ЖИВОТНО ДЕЛО“, кој преку своето пригодно обраќање рече дека наградите се значајни за професијата, но и за пошироката јавност, зошто преку нив би требало да се посочи во правците во кои треба да се размислува и да се вложува и дека наградите треба да го имаат и посебниот степен на општествена релевантност, за што постојано сите ние треба се залагаме.
„Денеска имаме голем повод и вистинска причина за споделување убави и пријатни чувства.
Јас сум особено среќен, задоволен и исполнет што оваа година, едно од највисоките општински признанија му се доделува на човекот Славко Крстевски кој со својата скоро 80 годишна животна и повеќе од 60 години долга и богата професионална и творечка биографија, речиси да нема период којшто не е подеднакво интересен, потресен, возбудлив, достоен за почит и примерен за нас со нешто помалку години, а особено за помладите.
Денеска сум дополнително среќен и задоволен што овој настан неслучајно се одржува во предвечерието на прославата на еден од најголемите празници на Македонскиот народ, 8. декември, Денот на упокојувањето на Св. Климент Охридски – Чудотворец. Еве зошто ние демирхисарци имаме причина повеќе да се гордееме со делата на наши сограѓани по примерот на Славко Крстевски и зошто да се радуваме и да ги чествуваме големите дела на личностите од подалечното минато кои токму заради големината и важноста на делото, останале и станале дел од нашата колективна меморија.
Биди нѝ и натаму благотворен, плодотворен, плодосоздателен и долговечен, драг наш Славко Крстевски“, – истакна градоначалникот Стојановски.

Со емотивен говор пред чинот за врачување на наградата, настапи поетот Славко Крстевски – учител, културно – уметнички и општествен деец и ентузијаст, синдикалист, трудбеник, новинар, повеќедецениски јавен и општествен работник, поет, писател, драматург, есеист, хроничар.

Наградата се доделува за постигнати големи и високи резултати и заслуги во областа на образованието, културата, уметноста, хуманитарните активности, јавниот живот и јавните дејности во Општина Демир Хисар, како и за литературното творештво чијшто непосреден изворник се обичните луѓе, Демир Хисар и неговото родно место Слепче.
Наградата ЗА ЖИВОТНО ДЕЛО се состоеше од ПЛАКЕТА и нето ПАРИЧЕН ИЗНОС од 30.000 ден. За висината на паричниот дел од наградата, на предлог на Комисија за одбележување на празници и манифестации и доделување на признанија и награди, одлучуваше Советот на Општина Демир Хисар.
Паричниот дел од наградата во симболична форма ја додели претседателот на Советот на општината.
Присутните гости, неговите пријатели како и љубителите на пишаниот збор имаа можност после завршувањето на официјалниот дел од свечената програма да се фотографираат со Славко Крстевски, да му честитаат, да му изразат јавна пофалба да му оддадат и изразат јавна благодарност за севкупниот личен придонес бидејќи со својата работа, труд, резултати и достигнувања придонесе за напредокот и угледот на Општина Демир Хисар.

Во тренд…