Американскиот бизнис-магазин „Форбс“ објави листа на 100 најмоќни жени во светот за 2018 година, на која германската канцеларка Ангела Меркел се наоѓа на прво место веќе осма година по ред.
Во објаснувањето се наведува дека, иако иднината на Меркел е неизвесна, со оглед на тоа дека нема да се кандидира за изборите во 2021 година, влијанието што го има како водач на Христијанско-демократската унија (ЦДУ) од 2000 година и како канцеларка од 2005 година е неоспорно.
Второто место го зазеде британската премиерка Тереза Меј, која беше на насловните страници во последните две години поради обидот за спасување на преговорите со ЕУ за брегзитот.
На трето место е Кристин Лагард, директорката на Меѓународниот монетарен фонд, која минатата година беше на осмото место на листата на „Форбс“.
