Недостигот од квалификувана работна сила во македонската економија е сѐ поизразен, а дебалансот на пазарот на труд е предизвик за стопанствениците, беше истакнато на денешната прес-конференција на Сојузот на стопанските комори на Македонија (ССК).
Потпретседателот на Сојузот, Александар Милошевски, рече дека по консултација со секторските и регионалните комори, евидентирано е дека во сите сектори недостигаат квалификувани работници, особено во градежништвото, индустријата, туризмот, услужните дејности, како и во приватното здравство.
Според анализите, топ-5 најбарани позиции за работа се продажба, возачи, дистрибутери, курири, кадар во угостителство, комерцијалисти и работници во магацин. По индустрии, најбарани се лица за работа во индустрија за малопродажба, угостителство, ИТ, трговија и дистрибуција, како и производство.
„Евидентен е недостигот на лица со насочено средно стручно образование, но и на инженери и медицински персонал. Во таа насока неопходна е професионална ориентација на учениците уште во основното образование и промоција на средните стручни училишта и занимања. Потребна е интегрирана соработка на сите општествени фактори за правилно адресирање за потребите од квалификувана работна сила, сето тоа да допре и до учениците и до родителите. Веруваме дека тоа е единствениот начин за намалување на јазот помеѓу потребите и понудата на пазарот на трудот“, истакна Милошевски.
„Потребна е консолидирана оценка за потребите на стопанството и човечките потенцијали во земјата со можност за преквалификации, а долгорочно стратешка промена на севкупниот обрзовниот систем. Реформите во образованието и наставните програми треба да ги следат потребите на стопанството и адекватно на тоа да се насочува и идниот кадар, кој треба да биде активен на пазарот на труд. Само на тој начин би имале систем што функционира. Исто така, по примерот на западните земји, како Германија, Австрија, едно од можните решенија е воведување на дуалниот систем на средното стручно образование или учење преку работа со системска поддршка и субвенции за учениците, кои би се определиле за таков вид образование“, истакна Милошевски и додаде дека стопанствените во Сојузот се подготвени во чекор да ги следат сите реформи што би влијаеле на подобрување на кадарот во компаниите, а со тоа и продуктивноста на самата компанија.
Сојузот на стопанските комори на Македонија е вклучен во програмите и ги информира компаниите за можностите понудени од ЕУ, како програмата „Еразмус плус 2014-2020“, понатаму владините мерки од оперативниот план, но потенцираат дека неопходна е подинамачина работа на ова поле во насока на развој на компаниите и задржување на работоспособното население во земјата.
