Буџетот што власта го предлага за 2019 година е мегаломански, расипнички и дополнително ќе ги осиромаши граѓаните на Република Македонија, обвини на денешната прес-конфренција портпаролот на ВМРО-ДПМНЕ, Димче Арсовски.
„Заев и СДСМ пред изборите ветуваа квалитетен образовен систем и најмодерни објекти, а сега во новиот мегаломански буџет за 2019 година предвидуваат помалку средства во клучните сегменти во образованието отколку што предвидуваа лани за буџетот за 2018 година. Лицемерството на Заев и СДСМ кон учениците и студентите е јасно како ден. Заев и СДСМ немаат намера да го исполнат ветеното од пред изборите. Заев и СДСМ за 2019 година предвидуваат помалку пари за ученички и студентски стандард, наука, за изградба и реконструкција на студентски домови во однос на она што го предвидуваа лани ова време“, вели Арсовски.
Лани, додава портпаролот на ВМРО-ДПМНЕ, за ученички стандард предвидуваа 6,7 милиони евра, а за наредната година сега предвидуваат 5,9 милиони евра или речиси 1 милион евра помалку.
СДСМ крати во предвидувањата и за студентскиот стандард за кој ветуваше дека ќе биде по европските примери рамо до рамо со европските студенти, изјави Арсовски и додава дека лани планира 14 милиони евра, а за наредната година крати во предвидувањата и планира 12 милиони евра или 2 милиона евра помалку испланирано во однос на минатата година за зголемување на студентскиот стандард.
„СДСМ крати во однос на ланските проекции на буџетот и за изградба и реконструкција на студентските домови кои прокиснуваат секојдневно кога ќе заврне поради негрижата на власта. Во буџетот за 2018 година планира 4,4 милиони евра, а во проекциите за буџетот за в година предвидува само 3,9 милиони евра или половина милион евра помалку. Ако се земе предвид фактот дека лани ниту реконструира ниту почна со изградба на ниту еден студентски дом, можете да замислите дека и оваа година нема да помрдне со прст и студентите повторно ќе живеат во истите лоши услови“, вели Арсовски.
Арсовски во својата изјава посочува дека за студентите немало пари за основните потреби, но затоа СДСМ предвидува 340.000 евра за купување нови возила за својата администрација.
