Нелегалните гранични преминувања продолжуваат да се намалуваат со што годинашната стапка е најниска од 2013 година наваму, изјавија од гранична агенција на Европската Унија, Фронтекс.
Во агенцијата се регистрирани 118.900 нелегални гранични преминувања во првите 10 месеци од годината, што е 30 отсто пониско во споредба со истиот период минатата година.
Агенцијата го припишува ваквиот тренд на падот во бројката на мигранти и бегалци што се одлучуваат да тргнат по опасната средоземска рута меѓу Либија и Италија. Бројот на луѓе што пристигнуваат во Италија е намален 87 отсто во споредба со минатата година.
И покрај ова, пристигнувањата на мигранти во ЕУ продолжува да создава негативен став кон нив. Италијанската популистичка влада зазеде цврст став во однос на имиграцијата, а министерот за внатрешни работи, Матео Салвини, вети дека ќе стави крај на бранот мигранти и дека ќе ги протера бродовите за спасување мигранти од пристаништата во земјата.
Од друга страна, Фронтекс наведува дека бројот на мигранти што пристигнале во Шпанија во октомври оваа година е двојно поголем од оној во октомври 2017 година.
