Клубот на млади лекари со поддршка на „Алкалоид“ од денеска почна со организација на Неделата на студенти по медицина, водени со мотото „Студентите по медицина – нашите идни лекари“.
Мисијата на проектот е враќање на довербата во медицинската професија и можноста за професионална себереализација на студентите и младите доктори во Р. Македонија. Клубот на млади лекари сака да им помогне на студентите, младите професионалци во здравството, идните лекари, како и на граѓаните, да дојдат до искористување на своите права преку интердисциплинарна соработка со академската заедница, еминентни експерти и медиумските работници. Во текот на Неделата ќе се остварат разни активности и настани сè со цел овозможување чувство на припадност во заедницата и мотивирање на студентите за остварување на своите цели во Р. Македонија преку непосредна кафе-средба на студентите со специјализанти („Медкафе“), мотивациски говори и инспиративни професионални приказни на успешни лекари, вмрежување помеѓу невладини организации што работат со млади професионалци од разни области и, конечно, посета на Фоднот за иновации и технолошки развој, каде што ќе се презентираат веќе успешни стартап-приказни од областа на медицината. На настаните во текот на Неделата на студентите по медицина секој студент ќе добие мантил како подарок од Клубот на млади лекари и „Алкалоид“.
„Ми претставува особена чест и задоволство што ‘Алкалоид’ е дел од овој проект, организиран од Клубот на млади лекари. Потикнувањето вакви идеи и настани е секогаш од заеднички интерес. Ние работиме во насока на поддршка со тоа што стипендираме студенти по медицина и по фармација преку Фондацијата ‘Трајче Мукаетов’, како и преку практикантството што ги вклучува студентите од Фармацевтскиот, Хемискиот и од Природно-математички факултет. Голем број млади лекари ја напуштаат државата, а за да се спречи тоа, секој треба да придонесе во својот домен. Вие сте новата генерација идни лекари и ние сметаме на вас во секој поглед“, изјави Живко Мукаетов, претседател на Управниот одбор и генерален директор на компанијата „Алкалоид“ АД Скопје.
Деканката на Медицинскиот факултет, Соња Топузовска, ја потенцира потребата за реализирање на проектот „Студентите по медицина – нашите идни лекари“, која произлегува од очигледната неможност на младата генерација од прва рака да се запознае со фактите и искуствата што ги имаат веќе дипломираните лекари. Истакна дека е од особена важност да се охрабрат студентите по медицина да ги развиваат својот интелект, вештини и самореализација во Р. Македонија затоа што се работи за личности што треба да бидат нашите идни доктори, чувари на нашето и здравјето на нашите најблиски.
Претседателот на Клубот на млади лекари, Никола Брзанов, нагласи дека целата на формирање на клубот е поголема вклучечност младите во процесите на одлучување и креирање на политиките во здравството.
„Нашата цел е да бидеме критичен и конструктивен партнер во реформите кои не може да се случат без учество на оние што утре ќе одлучуваат за промени преку промоција на систем на заслуги, кој е единствена гаранција за подобар здравствен систем и најпосле праведно општество. Иницијативи како нашата не само што ќе се стремат да создадат промени, туку ќе разберат дека за да се случат, потребно е да ги направиме нашите млади студенти храбри, да се спротивстават на неправдите, а во исто време и доволно вешти да ве излечат“, рече тој.
Клубот на млади лекари денешниот настан го доживува не само како можност да го прослави ова ново партнерство помеѓу Клубот на млади лекари и „Алкалоид“, туку е и праќање порака дека навистина постои грижа за процесите и можност да се направи нешто за тоа.
