Третиот нацрт-амандман денеска ќе биде разгледан на седница на собраниската Комисија за уставни прашања.
Со третиот амандман се отвора членот 3 од Уставот кој гарантира дека територијата на Македонија е неделива и неотуѓива и дека границата може да се менува само со закон. Власта во овој член додава дека Републиката ќе го почитува територијалниот интегритет, суверенитетот и политичката независност на соседните држави, како гаранција дека Македонија нема претензии кон соседите.
Со разгледувањето на нацрт-амандманите во Комисијата за уставни прашања започна втората фаза од уставните измени. За да поминат четирите нацрт-амандмани во следната фаза потребно е апсолутно мнозинство од 61 глас. Следен чекор е седницата на која предлог-амандманите треба да станат дел од Уставот, за што ќе биде неопходно двотретинско мнозинство, односно 80 пратеници да ги поддржат измените.
