Германските власти велат дека човек кој требало да се појави како сведок на судење во Кил не се појавил на парницата и бил пронајден мртов во еден тоалет во судот дури три дена подоцна.
Новинската агенција ДПА во вторникот објави дека 70-годишниот Германец требало да сведочи на 29 октомври во Окружниот суд во Кил. Според „Килер нахрихтен“, парницата била одложена, а службените лица залудно се обидувале да го контактираат по телефон.
Човекот, кој најверојатно имал срцев напад, бил пронајден во затворена кабина во тоалетот на 1 ноември.
Судскиот заменик-претседател Беате Флетоу изјави дека чуварите на судот отсега секој ден ќе ги проверуваат сите јавно достапни области. Флетоу рече дека чистачите очигледно претпоставувале дека пукнала некоја цевка и дека кабината била заклучена како мерка на претпазливост.
