Од денеска до 7 ноември во Босна и Херцеговина се одржува третиот регионален форум за иновација, технологија и претприемништво – Sarajevo Unlimited 2018, на кој ќе учествува и македонска делегација предводена од директорот на Фондот за иновации и технолошки развој, Јован Деспотовски. Тој ќе ги претстави мерките и активностите што ги презема државата за зголемување на економскиот раст преку поддршка на успешни иновативни бизниси.
Sarajevo Unlimited 2018 претставува прв регионален форум за иновација, технологија и претприемаштво, а целта на настанот е создавање платформа што ќе ги претстави и акцентира успешните приказни на она што веќе е постигнато во регионот во однос на имплементирање на иновациите во образованието и бизнис-екосистемот, но и поефикасно поврзување на инвеститорите, пазарите и релевантните институции.
Во рамките на третото издание на фестивалот ќе се одржи и посебна конференција за Кина и земјите од Централна и Источна Европа со наслов „16+1“. Во рамките на оваа конференција високи претставници од единаесет земји од Европската Унија и пет балкански земји ќе остварат средба со цел да ја промовираат соработката на полето на иновациите, технологијата, науката и претприемаштвото.
Се очекува повеќе од 400 странски делегати да го посетат форумот вклучувајќи и претставници на владини институции, корпорации, универзитети и истражувачки центри, како и креативни хабови.
