Претседателот на Демократската партија на Албанците (ДПА), Мендух Тачи, денеска, во Скопје, во резиденцијата на американскиот амбасадор Бејли, се сретна со заменикот на помошник-државниот секретар, Метју Палмер.
Како што пренесуваат од службата за информирање на ДПА, на средбата се разговарало за актуелната политичка ситуација, за имплементацијата на преспанскиот договор, како и за реформскиот процес.
Тачи на средбата истакнал дека ДПА ќе продолжи таксативно да ги поддржува уставните измени што произлегуваат од преспанскиот договор, како и процесот на реформи за целосна интеграција на земјата во НАТО и ЕУ.
За време на состанокот Палмер ја потврдил целосната поддршка од САД за преспанскиот договор и за агендата што ја води земјата до членството во НАТО и ЕУ.
