Горивата од ноќеска на полноќ поскапуваат од половина до денар и половина по литар.
Со одлука на Регулаторната комисија за енергетика, се врши зголемување на рафинерските и на малопродажните цени на нафтените деривати во просек за 1,6, односно за 1,58 отсто.
Малопродажната цена на бензинот еуросупер БС-98, не се менува и останува 74 денари, а цената на еуросупер БС-95 се зголемува за 0,50 денари и ќе изнесува 72,5 денари за литар. Малопродажните цени на еуродизел (Д-Е V) и на екстра лесното масло за домаќинство (ЕЛ-1) се зголемуваат за 1,50 денари и ќе изнесуваат 66, односно 54,5 денари за литар.
Со одлуката на РКЕ, за 0,347 денари за килограм се зголемува и малопродажната цена на мазутот М-1 НС кој сега ќе чини 34,351 денари за килограм.
Од РКЕ како причина за зголемувањето на малопродажните цени на нафтените деривати ги посочуваат за 3,61 отсто повисоката просечна цена на суровата нафта на светскиот пазар во изминатите 14 дена и за 1,412 отсто понискиот курс на доларот во однос на денарот.
