Придобивките од започнатиот процес на интегрирање на земјава во НАТО И ЕУ веќе се чувствуваат. Отворените врати за членство во ЕУ и НАТО и успешните економски политики носат повеќе пари, наведуваат во соопштение од владејачката СДСМ.
Оттаму додаваат дека во првото полугодие од годинава забележан е рекорден влез на странски директни инвестиции во Македонија од 327 милиони евра, што, како што велат, е за трипати повеќе во однос на истиот период лани.
„Забележан е раст на извозот од технолошко индустриските развојни зони за 17 отсто во споредба со ланскиот период од првото полугодие. Зголемен е бројот на работници во индустријата за 7,2%“, се наведува во партиското соопштение.
Според СДСМ, сето ова покажува дека трендот на инвестирање во индустријата во Македонија е со забрзано темпо, економијата е поставена на стабилни основи и Планот за економски раст дава резултати, а додаваат и дека овие придобивки дополнително ќе се интензивираат со влезот на Македонија во НАТО и започнувањето на преговорите со ЕУ.
