На денешното рочиште за случајот „Насилство во Општина Центар“ сведочеше поранешниот советник во Општината, Никола Ѓоргиевски, кој истакна дека за време на протестите неколкумина од граѓаните што протестираа им ги покажувале гениталиите на советниците од СДСМ и коалицијата, па дури и не им дозволувале да влезат во Општината сè со цел да не започне седницата на Советот, на чиј дневен ред биле ставени 3 спорни ДУП-а, меѓу кои и црквата „Св. Константин и Елена“.
„Првично не можевме да влеземе во Општината, па се снаоѓавме кој како знае, па кога успеавме да влеземе, лицата што протестираа почнаа да ги кршат стаклата на Општината, да ги покажуваат гениталиите, да нè нарекуваат антихристи и фашисти“, вели Ѓоргиевски.
Тогашниот советник истакна дека секогаш кога претседателот ќе го ставел дневниот ред на гласање, толпата од надвор станувала агресивна, а советниците од ВМРО-ДПМНЕ барале да се откаже седницата бидејќи немало услови за работа.
