Русија го обвини Западот дека се обидува да го опструира враќањето на сириските бегалци во земјите и да го блокира процесот на Обединетите нации (ОН) во реконструкција на државата.
Рускиот министер за надворешни работи, Сергеј Лавров, изјави денеска дека Секретаријатот на Обединетите нации тајно забранил учество во обновата на сириската економија, пренесе ТАСС.
Тој наведе дека упатиле прашање до Унеско како планира да ги реализира претходните договори за користењето на потенцијалот на организацијата за обнова на Палмира.
„Судејќи по објаснувањето што го добивме од организацијата за тоа зошто уште не можат да бидат реализирани, сфативме дека постои одредена директива од седиштето на Обединетите нации во Њујорк“, рече Лавров.
Според неговите зборови, се покажало дека политичкото одделение на Секретаријатот на ОН уште во октомври минатата година објавило и дистрибуирало тајна директива со која на организациите што влегуваат во тој систем им се забранува да учествуваат во проектите за обнова на сириската економија.
