Најавеното доаѓање на рускиот претседател, Владимир Путин, на венчавката на австриската министерка за надворешни работи, Карин Кнајсел, го критикуваа пратениците на Зелените во Европскиот парламент, Мишел Рејмон, како и Украина.
Рејмон побара оставка на министерката Кнајсел бидејќи таа го поканила Путин на својата венчавка, игнорирајќи го објаснувањето дека свадбата е приватна работа и дека Путин ќе биде приватно таму.
„Тиранот никогаш не е ‘приватен’“, порача тој во изјавата за АПА.
Тој рече дека австриската влада во ЕУ се смета за „продолжена рака на рускиот режим во Унијата“ и дека министерката го загрозува угледот на земјата со повикот на шефот на руската влада.
Министерката Кнајсел носи одговорност за ова и, со цел да се избегне штетата за Австрија, веднаш треба да поднесе оставка. Ако не го стори тоа доброволно, канцеларот Себастијан Курц треба да ја предложи нејзината замена на австрискиот претседател денес, кажа тој.
Рејмон истакна дека Кнајсел е министерка за надворешни работи на земјата што моментно претседава со ЕУ и дека Унијата ѝ наметна санкции на Русија поради „политиката на агресија“ на Путин.
Рускиот претседател беше обвинет за поддршка на сирискиот „масовен убиец“ Башар ал-Асад, за нападот со отров во Обединетото Кралство и манипулација со американските избори, како и за „влијание за време на референдумот за брегзит”.
„Путин е најагресивниот надворешнополитички противник на ЕУ. Затоа, сосема е неприфатливо што Кнајсел приватно го повика Путин на забава”, вели пратеникот.
Критиката дојде и од Украина, каде што претседателката на надворешната комисија на украинскиот Парламент, Хана Хопко, напиша на „Твитер“ дека Австрија „од денес веќе не може да биде посредник во Украина“.
