Српскиот претседател, Александар Вучиќ, на прес-конференција по средбата на „Балканската четворка“ во Солун, со премиерите на Грција, Бугарија и Романија, изјави дека во услови кога Европската Унија не секогаш дејствува единствено, овие четири земји се обединети и ги решаваат проблемите во овој дел на Балканскиот Полуостров.
„Никогаш не сум се мешал во суверени прашања на други држави, како што е името на вашиот северен сосед. Сепак, секој жител на Србија кој гледа дека двете земји кои имаат спротивставени ставови постигнаа договор мисли дека ова е добра вест за целиот регион. Би сакал тоа да продолжи и во иднина, без да навлегуваме во сопствените интереси на земјите“, објасни Вучиќ додавајаќи дека сето она што се одложува во иднина се враќа како бумеранг.
Вучиќ додаде дека со грчкиот премиер, Алексис Ципрас, разговарале за железничката пруга Белград-Скопје-Солун, како и тоа дека Србија ги завршува патиштата и ќе го заврши својот дел од автопатот до бугарската граница, како и границата со Македонија. Кога станува збор за односите помеѓу Белград и Приштина, тој им заблагодари на Грција, Романија и Бугарија за подготвеноста да го слушнат ставот на Србија по ова прашање.
