Турскиот Врховен изборен одбор (YSK) објави дека ќе ги разгледа жалбите во врска со безбедноста во округот Суруч, во југоисточната провинција Шанлиурфа, по тврдењата за местење на гласовите, пренесува „Хуриет дејли њуз“.
„Ние ги презедовме неопходните мерки за да почнеме административни и судски процеси во врска со наводните безбедносни проблеми на одредени избирачки места во Суруч”, рече шефот на YSK, Сади Ѓувен.
Лидерот на главната турска опозициска Републиканска народна партија, Кемал Киличдароглу, посочи дека се забележани изборни нерегуларности во југоисточниот дел на земјата и упати апел до набљудувачите да не забораваат дека се државни службеници, а не се во служба на политичка партија. Претходно на социјалните мрежи беа објавени видеоснимки на кои се гледа групно гласање во градот Суруџ, во провинцијата Санлијурфа.
Во меѓувреме полицијата открила четири вреќи полни со официјални гласачки ливчиња во автомобил што го запрела со пукање во воздух. Три лица кои се обиделе да ги пренесат гласачките ливчиња на гласачките места биле уапсени.
Тензијата во Суруч беше на високо ниво уште пред изборите. Три лица загинаа, а девет беа повредени во вооружен судир за време на изборната кампања на делегација од владејачката Партија на правдата и развојот (АКП) во Суруч на 14 јуни.
Во Турција се одржуваат претседателски и парламентарни избори. Во претседателската трка учествуваат шест кандидати: Реџеп Тајип Ердоган, Догу Перинчек, Мерал Aксенер, Мухарем Инџе, Селахатин Демирташ и Tемел Карамолаоглу. На парламентарните избори учествуваат осум партии обединети во две предизборни коалиции и уште три партии настапуваат самостојно.
Едната коалиција е Народна алијанса (или Републиканска алијанса) составена од владејачката Партија на правдата и развојот и Партијата на национално движење, а неофицијално е поддржана од Партијата на големо единство. Другата коалиција е Сојуз за нацијата, составена од главната опозициска Републиканска народна партија, Добра партија и Партија на среќата, а неофицијално ги поддржува Демократската партија.
На изборите покрај партиите од двете големи коалиции учествуваат и други три партии – турската прокурдска Народна демократска партија и Татковинската партија и Партијата Худа-пар. Во согласност со законските измени, турскиот Парламент ќе има 600 наместо 550 членови во иднина. Мандатот на претседателот и на пратениците е пет години
